பதப்படுத்தலுக்குத் தயாரிப்பு (தோலின் கதை - 5)

சின்ன வயதில் இழுத்துப் பிடித்து விண்ணென்று இருக்கும் தோல் வயது ஏற ஏற தளர்ந்து சுருங்கி விடுகிறது. இது எல்லாமே மனிதனுக்கும் பொருந்தும், மாடுகளுக்கும் பொருந்தும்.

இறந்து விலங்குகளின் தோலைப் பொருட்களாகச் செய்யும் போது, தோல் வலைப்பின்னலின் இயற்கையான உறுதி, வெப்ப நிலையைப் பாதுகாக்கும் தன்மை, வசதி போன்றவற்றைத்தான் விரும்புகிறோம்.

சுண்ணாம்பில் ஊற வைக்கும் போது வலைப்பின்னலைத் தவிர்த்த பிற புரதங்கள், சர்க்கரைப் பொருட்கள், வேர் பிடித்து நிற்கும் முடிகள் உதிர்ந்து விடுகின்றன. கறுப்பு, பழுப்பு, மஞ்சள் என்று நிறமளிக்கும் நிறமிகளும் கரைந்து போய் விடும்.

வலைப்பின்னலின் வேதி மூலக் கூறுகளினுள் நீர் புகுந்து தோல் உப்பி விடுகிறது. இந்த நிலையில் தோலை வேதி முறையில் நிலைப்படுத்தும் வேலை நடக்கும். இதற்கு அமிலவேதிச் சமநிலையை மாற்ற வேண்டும்.

சுண்ணாம்பு காரம், ஊறுகாய் அமிலம் என்றும் நமக்குத் தெரியும். சாப்பிட்ட பிறகு சுண்ணாம்பு தடவி வெற்றிலை போடுவது மூலம் வயிற்றில் எதிர்த்து வரும் அமில சக்தியை சமப்படுத்துகிறோமோ என்னவோ!

சுண்ணாம்பில் ஊற வைத்த தோலில் காரச்சத்து நிரம்பி இருக்கும், இதைக் குறைத்து அமிலத்தில் ஊற வைத்தால்தான் தோலைப் பதப்படுத்தும் அமில உப்புக்கள் உள்ளே நுழைய முடியும்.

கொதிக்கும் தண்ணீரில் போட்டு கொழுக்கட்டை செய்வார்கள் எங்கள் ஊரில். அரிசியை ஊற வைத்து கெட்டியாக அரைத்து உப்பும் தேங்காயும் சேர்த்து, உருண்டை பிடித்து போட வேண்டும். இந்த உருண்டையை தண்ணீர் நன்கு கொதித்த பிறகுதான் போட வேண்டும். ஆறிய நீரில் போட்டு விட்டால் அரிசி மாவு கரைந்து விடும். கொதிக்கும் நீரில் போட்டதும், உருண்டையில் மேற்பரப்பு உடனேயே வெந்து விட கரைதல் தடுக்கப்பட்டு உள் பகுதிகளும் வேகும் வரை கொதிக்க வைக்கலாம்.

அதே தத்துவம்தான் தோலை வேதி வினைக்கு உட்படுத்துவதிலும். கார நிலையில் அமில உப்பைச் சேர்த்தால் மேற்பரப்பிலேயே எல்லா வினையும் நடந்து விடும். தோலையும் அமில நிலைக்கு மாற்றி அதன் பிறகு அமில உப்பைப் போட்டால் உப்புக் கரைசல் ஊடுருவிச் சென்று வலைப்பின்னலின் ஒவ்வொரு மூலக்கூறின் அருகில் போய் நின்று கொள்ளும். இது அனைத்துமே சமையல் போல தண்ணீருக்குள் நடைபெறுவதுதான்.

நல்ல சமையல் தெரிந்தவர்கள்தான் நல்ல தோல் செய்ய முடியும் என்று சொல்வார்கள்.

சுண்ணாம்புத் தோலை அமில நிலைக்கு முதலில் சுண்ணாம்பை சம நிலைப்படுத்தி விட்டு, அமிலத்தை ஊற்றுவார்கள். அமிலத்தை நேரடியாக ஊற்றினால் தோலைக் கெடுத்து விடும் என்பதால் உப்புக்கரைசலில் ஊற வைத்து அதன் பின் அமிலக் கரைசலை சேர்ப்பார்கள். எலுமிச்சம்பழத்தின் அமிலத்தோடு உப்பு சேர்த்து ஊற வைப்பதால்தான் ஊறுகாய் உருவாகிறது. பழத்தை நுண்ணுயிரிகள் தாக்காமல் பாதுகாக்கிறது. மேலே சொன்ன உப்பும், அமிலமும் சேர்ந்த கரைசலில் ஊறிய தோலுக்கு ஊறுகாய் போட்ட தோல் என்றுதான் பேர்.